حرقة قلب وخيانة حُب

بسم الله الرحمن الرحيم

أول شي أحب أعرفكم بنفسي إسمي نايف عمري 24 سنه من مكه حاب أقص عليكم قصتي وهي قصة حصلت لي يعني مو من نسج الخيال أو منقوله عن فيلم عربي أو هندي أبغى أعرف إيش رايكم أو حكمكم على اللي راح تقروه طبعا راح أتكلم بلغتي اللغة الحجازيه وبدون تكلف والله على ماأقول شهيد ,

دايما نسمع عن العلاقات والحب والمحبوب وهذا يحب هذي وهذي تعشق هذا ومن هذا الكلام وأكثر مانسمع في نهاية العلاقه والله الشباب قاسيين والشباب بدون قلب وبعيدين بعد المشرقين عن الرومنسيه لكن المره هذي راح أترك الحكم لكم ماراح أكذب وأقول إني الولد اللي عمري ماعرفت بنات ولاحبيت لا عرفت بنات وحبيت وأتحبيت وبرضو بحكم طبيعة علاقاتي وإني للأسف إجتماعي من الدرجة الأولى علاقاتي مالها حد وخرجاتي ودخلاتي أكثر من الهم ع القلب المهم قصتي بدأت يوم 26 - 6 - 1429هـ جالس طفشان وكنت جالس ع الشات طبعا زي أي طفشان أعلق وأبكش يعني انتو عارفين ايش اللي يصير في الشات المهم قريت نك لفت إنتباهي حبيت أتكلم ع الخاص وطبعا حصل تجاوب من الطرف التاني أتكلمنا يمكن لمدة ساعتين وبعد كذا كملنا ع الإيميل وبعد كذا كانت المكالمه ع الجوال تعرفت عليها واتعرفت علي كانت بداية العلاقة عباره عن صداقه إعجاب المهم مرت الأيام وكانت علاقتنا كل يوم تقوى أكثر من اليوم اللي قبله كل يوم أحس إني أتعلق فيها أكثر خصوصا بعد ماعرفت ضروفها ووضعها مع أهلها صارحتها تقريبا بعد ثلاثة أشهر بحبي لها ويمكن تقولو ثلاثة أشهر غير كافيه هذي وجهة نظركم أحترمها وأقدرها لكن لو كنتو مكاني كان عذرتوني لما قلتلها إني أحبك قالت أخيرا بدري ماكنت تبغى تقولها والله هذا مو تقل ولا تغلي بس كنت أبغى أتأكد من حقيقة مشاعري ناحيتها طبعا بعد فتره صارحتني كمان بحقيقة مشاعرها ناحيتي وبعد فترة عرضت عليها إني أتقدم لها بس هي رفضت قالتلي أول أنتهي من دراستك في الجامعه وأتقدم بعد ما تتوظف حاولت إني أقنعها وأنا الحمد لله عندي شقه جاهزه وسياره وموظف وظيفه جيدة بالجامعه لكن محاولاتي فشلت هذا الكلام تقريبا بعد سبعة أشهر بعد ماعرفت عنها أدق تفاصيل حياتها وفي المقابل كنت لها كتاب مفتوح تقلب صفحاته زي ماتبغى أنا أعترف إنها حبتني وأنا حبيتها بس أنا قلتلها كلمة وكنت صادق فيها قلتلها لو حبيتيني ربع الحب اللي لكي في قلبي أعتبر إنك حبيتيني لأن الربع راح يكون كبير جدا لأن حبي لكي ماله حدود وفي زياده بمعدل خيالي وأكبر دليل لحبي لكي إني وقفت قدام أهلي وقلت ماراح أتزوج غيرك رضو ولا مارضو وبالفعل أقنعت أهلي إنها الشخص المناسب اللي يكمل نصفي الثاني وانها الشخص اللي اتمنى أكون معاه في الدنيا والآخره كمان حاولت وحاولت حتى اقتنعو بكلامي أنا ماقول ان علاقتنا كانت نازله من السما ومافيها مشاكل لا كان فيها زعل ورضى بس كان كل شي يحصل بعيد عن حبي لها لأنه يعتبر أطهر من كلمة طهاره وأصدق من كلمة صدق وكان أحلى شي صار لي في دنيتي كلها ماأنكر إني ماتغيرت لا تغيرت وتغيرت كثييييييييييييييييييييييييييير جدا أول حاجة صارت من يوم عرفتها سحبت على كل اللي كنت أعرفهم خرجاتي صارت قليله جدا جدا خلال سنه كامله أتحدى لو انها في يوم من الأيام أتصلت على أي رقم من أرقامي ولقته إنتظار كنت صادق بكل حاجة وماأقول انه غلط تكون صادق بس الغلط إنك تكون صادق مع ناس ماتستاهل ماأعتقد اني خبيت عليها شي حتى ادق المواضيع طبعا الشي اللي مافي أحد يعرفه على وجه الأرض إلا الله عز وجل ثم هي طبعا أنا كنت متزوج بالسر وكنت مخلف وكان عندي ولد اسمه عبدالعزيز طبعا أم عبدالعزيز توفت بعد ماولدت عزووز بـ 6 ساعات وعزوووز اللي كان أحلى حاجه في حياتي توفي قبل تقريبا 3 أشهر لأنه كان مريض عنده ثقب في القلب وضعف في وظائف الكبد والكلى وطبعا كانت عنده المناعه صفر يعني كنت محتاج أحد يوقف جمبي وصارحتها بكل حاجه يمكن مصارحتي كانت متأخره لأنها كانت قبل مايتوفى عزوو بيوم واحد بس لما حسيت اني ماني قادر اتحمل لوحد وانا شايف روحي بتضيع مني وماني عارف ايش اسوي احتجت لأحد يوقف جمبي وبالفعل كلمتها وقلتلها وبعد ماقلتلها بـ 24 ساعه توفى عبدالعزيز رحمة الله عليه لاتسألوا عن نفسيتي ولا حالتي نسيت طعم الضحكه عجبتني مرارة الدمعه انطويت على نفسي خلاص حياتي ماعد بقي فيها شي تعبت تعبت بكل ماتحمل كلمة تعبت من معنى لكن الواحد مايقول الا الحمدلله على كل حال ولله ماأخذ وله ماأعطى طبعا بعد اصرار وإلحاح وضغط من أهلي خصوصا من الوالده الله يطول في عمرها خرجت من البيت وغيرت جو وصرت أجلس مع اهلي هذا بس لأني أعرف كيف الأم والأب يتعبو ويزعلو لو صار شي لأولادهم لأني مجرب ومحروق بفضل الله عز وجل برد قلبي والله تعالى ألهمني الصبر طبعا ماأنقطعت اتصالاتي بحبيبتي بس كنت أحس إنها متغيره علي يعني تدقق في كل حاجه وتستنالي تكه وتزعل مني وأنا كنت أكبر عقلي وأداريها وأعتذر حتى لو ماني غلطان بعد فتره كان عيد ميلادها طبعا قلت في نفسي الزعل في القلب مو لازم احسسها اني متضايق او بالأصح أبغى أموت من القهر على ولدي اللي راح من بين يدي وضغط على نفسي وأحتفلت بعيد ميلادها وحجزت كل شي كل اللي عليهم انهم يرسلو السواق ويجيب الاغراض وبالفعل احتفلو بالمناسبه هذي وانا كنت اتقطع من داخلي على ابني مرت الأيام وأنا بطبعي لما أحس إحساس يتحقق مو مبالغه ولا بكش هذي حقيقه زادت المشاكل والمشادات بيننا كلمتها وقلتلها يافلانه انا حاسس اننا راح نفترق بس طلبي ورجائي منك إننا نحاول مع بعض ونكذب الإحساس هذا ساعديني وأساعدك لانضيع كل اللي بنيناه وبعدين نندم على كل شي هذي أزمه وإنشالله نعديها مع بعض ردت عليا وحسيت من ردها انها تبغى الشي هذا تبغى تنهي العلاقة بس ماهي عارفه كيف ؟؟؟؟ مرت الأيام ومرت الأشهر والوضع ماتغير فيه شي بالعكس كل يوم أسؤ من اللي قبله حتى جا ذاك اليوم بتاريخ 1 - 5 - 1430هـ وأنا متذكر التاريخ لأنه كان قبل يوم عيد ميلادي بيومين يومها كنت في الكباين مع أهلي وكانت الفرحه مصتنعه والضحكه بدون طعم لأنها كانت مجامله لأن الشي اللي بداخلي محتاج لوقت ووقت مو قصير عشان أتناساه لأني مستحيل أنساه ولو مو مصدقين أسألو أي أب أو أم فقدت ابن او بنت أسألوهم هل نسيوهم بمجرد موتهم ؟؟؟؟ أرسلتلي مسج وقالت فيه نايف معليش أنا ماقدر أكمل معاك أنا تعبت انت طيب وقلبك حنون وألف وحده تتمنى تكون حبيبتك او زوجتك وانشالله تقابل وتحب وحده احسن مني انا تعبانه ماقدر اكمل معاك ولاتتصل عليا ولاتحرجني , أنا قريت المسج طبعا ردة فعلي كانت بكل بساطه وانا جالس وسط اهلي كلهم جلست أضحك بصوتي كله يمكن دقيقتين من الضحك المتواصل بعدين سكتت وعيوني بدأت تذرف أغلى الدموع ( ايوه رجال وأبكي وبكيت ) طبعا الكل صابهم ذهول وسط نظرات استغراب وتعجب قبل شويه يضحك والان يبكي الكل ساكت وماحد نطق بحرف واحد طبعا قمت من المجلس ورحت غرفه مافيها أحد قامت ورايا أمي وسألتني ايش اللي صاير ايش فيك كل أجوبتي كانت غير مفهومه والدموع كانت أوضح اجابه ماقدرت اجلس معاهم طلعت مكه جلست لحالي صرت اكلم نفسي زي المجانين اتصلت عليها وسألتها عن السبب كان جوابها انها تعبت وماتقدر تكمل طيب ايش اللي تعبك قوليلي ؟ اجابتها كانت سكوت طويل انهيت المكالمه وماصار فيني عقل ايش الحل وقلت في نفسي هذي رغبتها ولازم احترمها وقفلت ع الموضوع طبعا جالس أكذب على نفسي .
أبغى أعرف بس هل هذي جزاتي ؟
حافظت عليها زي روحي كانت في حظني وكنت أقدر أسوي أي شي وانتو فاهمين قصدي بس ماسويت ليش ؟؟
عشان اللي يحب مايسوي .
هل هذي جزاتي لأني ماخنتها ولاضحكت عليها ولعبت بيها وأتسليت بيها زي مو حاصل الآن في الوقت الحالي مع كثير من البنات ؟؟ ليييييييييييييييييييييييييييش
الصريح هذي الأيام يعتبر مغفل وهذي الحقيقه .
طبعا ماني قادر أنساها وقبل أسبوعين رحت لعمها وكلمته وأتقدمت وقلتله متى يناسبكم أرسل أهلي رد عليا بعد 4 أيام وقاللي البنت ماتفكر في الزواج حاليا والله يستر عليك ويرزقك ببنت الحلال اللي تصونك وتحفظ اسمك .
قولولي ايش الحل ؟ ايش أسوي ؟ أقدر أنتقم بس ماتهون عليا رغم انها تركتني في أكثر وقت أنا محتاج لها فيه تركتني وأنا في أصعب أزمه ممكن يمر بيها الانسان .
ضحيت كثير بس للأسف كانت تتسلى ومالها ولاعندها أي عذر مقنع .

احببتها حتى انتحرت حروف عشقى على اعتاب البوح
احببتها حتى احترقت معانى الحب خجلا ,,,, حتى الغيت وجودى
فلا وجود لى الا بوجودها !!؟
اعتدت ان اسمع كلمات الحب ولاانطقها واليوم انا انطقها ولااسمعها!!!!

حتى شعرت انفاسها تسكن صدري وتتسلل الى صميم روحي
احببتها حتى اتقنت تخاطب الارواح عن بعد

جربت نار الظلم جربت الاحداث المؤلمه جربت حياة الحرمان والعذاب ولكن لم يؤلمني شيء في
حياتي كألم عذابها وبعدها لم يحرقني شيء في حياتي كنار ظلمها!!!!
اااااواه000 بدأت اذوب واتلاشى كما تذوب قطع الثلج في نار هادئه !!!

اشاهد فلم حياتي البائس الحزين يمضي ببطء فألملم ورودى الذابله من حنايا قلبي لاصنع
بها تابوتا لروحي اليائسه
سأظل احبك رغم صرخات العذاب التي يهتز لها كياني

بالأمس وجدت بعض سطورك فقبلت كل حرف فيها ووضعت الورقة على صدري وانثنيت عليها
فشعرت كبدي تتصدع الما من حنيني اليك

اعلم انك لم تقدريني حق قدري اعلم ان جميع خصالك التي احببتك من اجلها سقطت من عيني
دفعة واحده ولكني مازلت احبك حبا يسري مع كل قطرة من دمي حبا لاتفسير له
سأذكرك مع كل اطلالة فجر مع كل مرور نسمة بارده كتلك التي كنا نتحدث بها !!!

رغما عن هذا العقل الجبار الذي يستنهض كل ذكريات جروحك لي
يستنهض كل الحقائق والقوانين واحكام الحياه

Naif
منتظر ردودكم ...........